Ky proces elektoral shihet si një test kyç për Kryeministrin Albin Kurti dhe partinë e tij, Lëvizjen Vetëvendosje, në përpjekje për një mandat të dytë në krye të qeverisë.
Gara për postin e kryeministrit mbetet në fokus, me Kurtin që do të përballet me rivalët kryesorë: Bedri Hamzën nga Partia Demokratike e Kosovës (PDK), Lumir Abdixhikun nga Lidhja Demokratike e Kosovës (LDK) dhe Ramush Haradinajn nga Aleanca për Ardhmërinë e Kosovës (AAK).
Në mbarë vendin do të hapen 903 qendra votimi, ku do të garojnë 1,280 kandidatë nga parti politike, koalicione dhe nisma qytetare, përfshirë edhe një kandidat të pavarur. Për të siguruar një vend në Kuvend, një subjekt politik duhet të kalojë pragun prej 5 për qind të votave.
1.9 milionë votues brenda Kosovës, rreth 50,000 qytetarë do të votojnë në 17 ambasada dhe 15 konsullata jashtë vendit, ndërsa mbi 50,000 të tjerë janë regjistruar për të votuar me postë.
Nga 120 vendet në Kuvend, 100 do të zgjidhen me votim të drejtpërdrejtë, ndërsa 20 janë të rezervuara për komunitetet jo-shqiptare. Prej tyre, 10 vende i takojnë komunitetit serb, ku tradicionalisht dominon partia Srpska Lista, e mbështetur nga Beogradi.
Zgjedhjet mbahen në një klimë të tensionuar politike, pasi përfaqësuesit serbë në Kuvend kanë bojkotuar punimet e Kuvendit që nga nëntori 2022, në shenjë proteste ndaj politikave të qeverisë Kurti në veri të vendit. Procesi zgjedhor pritet të jetë një moment vendimtar për të ardhmen politike të Kosovës.
