Shumë punonjës të Zërit të Amerikës janë pezulluar nga puna, menjëherë pas urdhrit të firmosur nga presidenti amerikan Donald Trump.
Kjo gjë bëhet me dije nga një prej gazetarëve të rëndësishëm të “Zërit të Amerikës” në versionin e gjuhës shqipe, Elez Biberaj.
Sipas tij, ky vendim do të ketë pasoja të rënda për imazhin dhe interesat globale të SHBA-së, si dhe për promovimin e vlerave demokratike në botë.
“Zëri i Amerikës, një fener shprese dhe të vërtetës për qindra miliona anembanë globit, u mbyll sot në emër të reduktimit të burokracisë federale.
Për më shumë se tetë dekada, Zëri i Amerikës ka qenë një forcë jetike në promovimin e idealeve demokratike të Amerikës, duke paraqitur me besnikëri politikat e SHBA-së, duke avancuar interesat kombëtare dhe duke shërbyer si një burim i besueshëm lajmesh të besueshme për miliona në rajone të privuara nga informacioni.
Vendimi për të çmontuar një nga asetet më të mëdha kombëtare të Amerikës do të shkaktojë dëm të thellë në imazhin e SHBA-së, interesat e saj globale dhe promovimin e vlerave demokratike – dëm që asnjë kundërshtar nuk mund ta arrijë kurrë. Sot shënon një kapitull thellësisht të trishtuar në historinë e angazhimit të Amerikës me botën”, shkruan Biberaj.
Disa punonjës të Zërit të Amerikës u pezulluan këtë të shtunë, një ditë pasi Trump nënshkroi një urdhër ekzekutiv që godet median e financuar nga qeveria dhe gjashtë agjenci të tjera federale.
Punonjës të shumtë në Zërin e Amerikës, një transmetues mediatik ndërkombëtar që operon në më shumë se 40 gjuhë, ndanë me Reuters një email që i vendoste ata në leje administrative me paga dhe përfitime të plota “derisa të njoftohej ndryshe”.
Ky urdhër përfshin Agjencinë për Media Globale, e cila mbulon Zërin e Amerikës, Radion Evropa e Lirë dhe Azia, si dhe Radio Marti, e cila transmeton lajme në gjuhën spanjolle në Kubë.
