Nga Samir Mane, te Dulakët, Luan Muça, Gjikuria dhe Carapuli, biznesmenët që do të furnizojnë resortet me ujin e Tragjasit.
Një dokument i emërtuar “Raport teknik i vlerësimit të nevojës për ujë”, i hartuar me porosi të Bashkisë së Himarës në gusht të vitit 2023 nga studioja “Grama Consulting &Engineering”, tregon se ujësjellësi i ri i tragjasit do të shërbejë ekskluzivisht për furnizimin e zonave të investimeve strategjik në Draleo, Drimadhes dhe Dhërmi, pa përfshirë fshatrat ekzistues në Palasë, Gjilekë, Kondraq dhe Dhërmi.
Sipas dokumentit, nga ujësjellësi i ri do të përfitojnë 3 projektet e kompleksit Green Coast në Draleo/ Palasë në pronësi të grupit “Balfin” të biznesmenit Samir Mane me 360 mijë metra katrorë ndërtim; kompleksi Gone Perivol i ndërtuar nga kompania Concord Investment i vëllezërve Dulaku me 110 mijë metra katrorë ndërtim si dhe projekti Delta Falaise Resort & Village i kompanisë Delta të Luan Muçës me 100 mijë metra katrorë ndërtim.
Gjithashtu, nga ujësjellësi i ri parashikohet të përfitojnë edhe kompleksi “Ionian Olea” i ndërtuar nga kompania Shushica sh.p.k me 35 mijë metra katrorë ndërtim; një investim i Trema Shpk me aksioner Ilir Trebickën me 20 mijë metra katrorë ndërtim; projekti “Coast to Coast” i kompanisë Gjikuria me 50 mijë metra katrorë ndërtim si dhe projekti “White Rocks” i kompanisë Eurocol i Pandeli Carapulit me 25 mijë metra katrorë ndërtim.
Në total, ujësjellësi i ri i Tragjasit parashikohet të furnizojë 700 mijë metra katrorë ndërtim në të tre zonat, ku sipas raportit, norma e përdorimit është e lartë.
“Referuar normativave të mësipërme si dhe duke mbajtur në konsideratë që kemi të bëjmë me turizëm elitar në këto zona, është mbajtur norma minimale e konsumit 250 l/banor në ditë dhe për turistët rezidencialë 280 l/ banor në ditë, e cila merr në konsideratë nevojat për vaditjen e kopshtit, përdorimin e pishinave…,” thuhet në raportin teknik.
