Gazetari Eni Ferhati ka paralajmëruar arrestime të tjera. Ai ka deklaruar se në janar pritet të ketë zhvillime të reja në drejtësi.
Ferhati deklaroi se pasi të vinë informacionet e reja lidhur me dosjen e Sky ECC, mund të kemi dosje të reja penale, ndërsa shtoi se tashmë janë marrë nën hetim nga SPAK ngjarje shumë të rënda.
Ai shtoi se ka ngjarje të tjera shumë të rënda të cilat janë marrë tashmë nga SPAK, siç është edhe masakra e fundit e Dobraçit për të cilën janë lëshuar edhe disa masa sigurie.
“Ajo që më ka bërë përshtypje është dosja e fundit, ajo e organizatës kriminale të Suel Çelës, sa i takon mënyrës se si kjo organizatë e ushtronte influencën e saj në territor edhe sa i takon komunikimeve që më pas janë zbardhur nga njerëz të drejtësisë.
Ajo që mua më pëlqen në strategjinë e Prokurorisë së Posaçme, janë hetimet që SPAK po u bën tenderëve publik.
Abuzimi më i madh me fondet e taksapaguesve shqiptarë janë te tenderët dhe Prokuroria e Posaçme një punë të mirë po e ushtron pikërisht te ankandet publike. Këtu kemi parë çudira nga më të ndryshme se si bëhet kopsitja e letrave për të favorizuar një kompani të caktuar. Kjo ka bërë që institucionet të jenë më të kujdesshme me ushtrimin e detyrave të tyre.
Unë besoj se në janar, me ardhjen e informacioneve të tjera nga Sky, ndërkohë keni edhe Matrix në horizont që nuk dihet nëse do të hetohet njësoj. Do kemi dosje të tjera penale. Ka ngjarje të tjera shumë të rënda të cilat janë marrë tashmë nga SPAK, siç është edhe masakra e fundit e Dobraçit për të cilën janë lëshuar edhe disa masa sigurie”, tha Ferhati.
