Prokuroria e Posaçme ka futur në panik politikën. Ditën e djeshme u publikua raporti vjetor i SPAK për vitin 2024 dhe bëhej me dije se janë aktualisht nën hetim 33 funksionarë të lartë shtetërorë.
Sipas të dhënave të SPAK, nën hetim është një ish-kryetar Kuvendi që është dërguar për gjykim, si dhe një ish-kryeministër, i cili është nën hetim. Në pamje të parë mendohet se për ish-kreun e Kuvendit është Meta. Por nëse shohim të dhënat, në fakt nuk përputhen.
SPAK njofton se ish-kreu i Kuvendit është dërguar për gjykim. Në fakt Ilir Meta është nën hetim dhe nuk është mbyllur dosja. Pra nuk është ai. Atëherë kush të jetë vallë?
Tek ish-kryeministri, gjasat janë të jetë Berisha. SPAK i ka mbyllur hetimet dhe ka dërguar dosjen në gjykatë, por GJKKO ende nuk ka vendosur kalimin për gjykim.
SPAK bën me dije se janë gjithashtu nën hetim 4 deputetë, ku vetëm 1 është dërguar për gjykim. Me gjasë ky i fundit është Asllan Dogjani, ndërsa nuk e dimë se kush janë 3 të tjerët. Po ashtu në listë janë 3 ish-ministra, 7 ish-krerë bashkish, etj.
“Gjatë vitit 2024, rezultojnë 33 zyrtarë të lartë nën hetim (ku dy prej tyre janë të regjistruar në dy procedime të ndryshme secili), nga të cilët 19 zyrtarë janë dërguar në gjykatë me kërkesë për gjykim. Siç shihet dhe nga tabela e mësipërme, nga numri total i ish zyrtarëve të lartë nën hetim, 19 prej tyre janë dërguar në gjykatë, që përfaqëson 52.9% të rasteve. Kjo e dhënë tregon një nivel të lartë të përfundimit të hetimeve, me ngritje akuzash konkrete për këtë nivel të sofistikuar korrupsioni”, thekson SPAK.
Më tej bëhet me dije se lidhur me volumin e çështjeve nën hetim për veprat penale në fushën e korrupsionit, gjatë vitit 2024, Prokuroria e Posaçme ka shënuar një rritje me rreth 8% krahasuar me vitin paraardhës, 447 çështje nën hetim për vitin 2023, në 483 çështje nën hetim për vitin 2024). Po kështu, është rritur me rreth 20%, edhe numri i personave të cilët kanë qenë nën hetim për vitin 2024 në krahasim me ata të vitit paraardhës (nga 212 persona nën hetim në vitin 2023, në 257 persona nën hetim në vitin 2024).
