SPAK thërret për të marrë në pyetje ish-kryetarin e Bashkisë së Durrësit, Vangjush Dako për dosjen ‘Çyrbja’.
Dako ende nuk ka mbërritur në Prokurorinë e Posaçme, por burimet thonë se do të pyetet për dosjen që çoi në burg ish-deputetin e PS, Jurgis Çyrbja.
Çyrbja dhe bashkëpunëtori i tij Ahmet Masha u arrestuan më datë 20 tetor, me urdhër të Prokurorisë së Posaçme Antikorrupsion, pas zbërthimit të komunikimeve në Sky Ecc.
Mësohet se Dako do të merret në pyetje lidhur me dosjen e ish-deputetit socialist, Jugis Çyrbja, i cili është arrestuar dhe akuzohet për blerje votash dhe lidhje me krimin.
Nga zbërthimi i bisedave në SKY ECC, u zbulua se në favor të votave për t’u zgjedhur si deputet në qarkun Durrës në zgjedhjet e 2021, Çyrbja, informonte bosë të krimit për operacionet policore me qëllim që ata të mos arrestoheshin. Ndërkohë që Edmond Koçi, i njohur si Mond Çekici, i cili u ekzekutua në 2021 dhe Altin Hajri, i shumëkërkuar për rrëmbimin e zhdukjen e Jan Prengës kanë ndikuar sipas SPAK pranë zyrtarëve socialistë që emri i Çyrbjas të ishte në listë të sigurt për deputet.
Dako do të japë shpjegime se kush e propozoi dhe renditi të 5-tin në listë, Çyrbjan.
Jurgis Çyrbja akuzohet për “tregimi i sekretit shtetëror nga shtetasit”, kryer më tepër se një herë (sipas episodeve respektive), “përkrahja e autorit të krimit”, kryer më tepër se një herë (sipas episodeve respektive) dhe “tregimi i sekretit shtetëror nga shtetasit”.
Kujtojmë se një javë më parë, Gjykata e Posaçme e ka dënuar me 2 vite e 8 muaj burg Vagjush Dakon, i cili akuzohet se ka kryer veprën penale “shpërdorim detyre”, në dy raste.
Njëri rast, ka të bëjë me ndërtimin e një pallati në Durrës 11 vite më parë, i cili u shemb nga tërmeti në nëntor të vitit 2019 dhe rasti tjetër ka të bëjë me një tender për ndërtimin e një shëtitoreje në vitet 2014-2015, që i ka shkaktuar buxhetit të shtetit një dëm prej 18 milionë lekë.
