Një tender për rikonstruksionin e shkollës 9-vjeçare “Rilindja” në Bashkinë e Gramshit ka ngritur shqetësime për mënyrën se si është ndarë fondi i tij. Autoriteti kontraktues, Bashkia Gramsh, shpalli fitues kompaninë INERTI, e cila ofroi një vlerë prej 87,923,313 lekë të reja pa TVSH (gati 1 milion euro me TVSH). Ky rezultat përbën një shqetësim pasi disa konkurrentë në garë ofruan vlera shumë më të ulëta se fituesi.
Në garë morën pjesë pesë kompani, dhe dy prej tyre ofruan çmime që ishin rreth 150 mijë euro më të ulëta se oferta e kompanisë fituese. Pavarësisht kësaj, tenderi u fitua nga firma INERTI, në pronësi të Florjan Muha dhe Halil Muha.
Fondi limit i tenderit ishte 92,556,705 lekë të reja pa TVSH (gati 1.1 milion euro me TVSH), ndërsa rezultati i shpallur është vetëm 4.99% më pak se fondi maksimal i lejuar. Kjo diferencë ka ngjallur dyshime mbi mënyrën e menaxhimit të procesit, duke vënë në qendër të kritikave drejtuesin e Bashkisë Gramsh, Besion Ajazi, për shpërdorim të fondeve publike.
Proçedura e ndjekur për këtë tender ishte e hapur, me numrin e referencës REF-12742-07-10-2024, por fakti që nuk u përzgjodh një ofertë më e lirë ka krijuar mjaft dyshime se kemi të bëjmë me një fitues të paracaktuar.